धनगढी । बाजुराको गौमुल गाउँपालिका–३ दल्लेरीमा बाघको आक्रमणबाट १७ वटा भेडा र बाख्राको ज्यान गएको छ। स्थानीय मदन बोहराको गोठमा रहेका ५६ मध्ये ११ भेडा र ६ बाख्रा बाघले मारेको हो।
आइतबार राति गोठको छानामा बाँधेर राखिएका भेडा–बाख्रामाथि बाघले आक्रमण गरेको हो । बिहान खेतीपातीका लागि गएका स्थानीय भरत बोहराले मरेका, आधा खाएर छोडिएका र ५ वटा घाइते अवस्थामा रहेका पशु फेला पारेको जानकारी दिएका छन्।
किसान मदन बोहराका अनुसार उक्त घटनाबाट झन्डै २ लाख ८० हजार रुपैयाँ बराबरको क्षति भएको छ। भेडा(बाख्रालाई प्रमुख आयस्रोतको रूपमा प्रयोग गर्दै आएका उनले अबको जीविकोपार्जनमा समस्या परेको बताएका छन्।
पछिल्ला दिनहरूमा बाघको लगातारको आक्रमणका कारण स्थानीयको भेडा पालन व्यवसाय सङ्कटमा परेको छ। यस प्रकारको जनावर आक्रमणले गाउँमा त्रास फैलिएको छ भने प्रशासन र सरोकारवाला निकायको ध्यानाकर्षण आवश्यक भएको स्थानीयले बताएका छन् ।
