तिलोत्तमा, १७ असार ।
आईसीएफसी फाइनान्स लिमिटेड, ड्राइभरटोल शाखाले आफ्नो संस्थागत सामाजिक उत्तरदायित्व (CSR) अन्तर्गत एक विशेष राहतमूलक कार्यक्रम सम्पन्न गरेको छ। फाइनान्सले तिलोत्तमा नगरपालिका वडा नं. १ का आर्थिक रूपमा विपन्न तथा विपन्न परिवारलाई लक्षित गरी बढ्दो गर्मी महसुस गराउन ‘स्ट्यान्ड फ्यान’ वितरण गरेको हो।
तिलोत्तमा नगरपालिका वडा नं. १ का वडा अध्यक्ष श्री फरशुराम गिरीको प्रमुख आतिथ्यतामा आयोजित उक्त कार्यक्रममा वडा सदस्यहरू श्रीमती गीता देवी न्यौपाने, हीरा देवी बी.के. र विष्णु प्रसाद पाण्डेय विशिष्ट अतिथिका रूपमा उपस्थित हुनुहुन्थ्यो।
औपचारिक आसन ग्रहण र स्वागत मन्तव्यपछि प्रमुख अतिथि तथा अतिथिहरूले शुभकामना मन्तव्य व्यक्त गर्नुभएको थियो। कार्यक्रममा बोल्दै अतिथिहरूले बैंक तथा वित्तीय संस्थाहरूले व्यवसाय मात्र नगरी स्थानीय समुदायको सुख-दुःखमा सारथी बन्नुपर्ने र आईसीएफसीले सोही अनुसार सराहनीय कार्य गरेको बताउनुभयो।
समयको सीमिततालाई ध्यानमा राख्दै कार्यक्रममा कुनै ढिलाइ नगरी सिधै वितरण कार्य अगाडि बढाइएको थियो। टन्टलापुर गर्मीको समयमा घरमा प्रयोग गर्न मिल्ने स्ट्यान्ड फ्यान पाएपछि स्थानीय लक्षित लाभग्राहीहरू निकै हर्षित देखिएका थिए।
फ्यान वितरण सम्पन्न भएपछि अतिथि श्री महेन्द्र सुवेदीले संस्थाको सामाजिक उत्तरदायित्व र यस्ता जनपक्षीय कार्यक्रमहरूको महत्वबारे छोटो तर प्रेरणादायी मन्तव्य राख्नुभएको थियो। उहाँले आगामी दिनमा पनि संस्थाले सामाजिक कार्यलाई निरन्तरता दिने प्रतिबद्धता जनाउनुभयो।
कार्यक्रमको समापन गर्दै टोल विकास सञ्जाल समितिका अध्यक्ष श्री टोपलाल भण्डारीले विपन्न परिवारको घाउमा मलम लगाउने काम गरेकोमा आईसीएफसी फाइनान्स लिमिटेड, ड्राइभरटोल शाखालाई धन्यवाद ज्ञापन गर्नुभयो। सौहार्दपूर्ण वातावरणमा सम्पन्न यस कार्यक्रमले वित्तीय संस्था र स्थानीय समुदायबीचको सम्बन्धलाई अझ सुदृढ बनाएको विश्वास गरिएको छ।
उक्त गरिमामय कार्यक्रमको सञ्चालन भने आईसीएफसी फाइनान्स लिमिटेड, ड्राइभरटोल शाखाका प्रबन्धक (Branch Manager) श्री सन्तोष बहादुर एम.सी. ज्यूले गर्नुभएको थियो। आफ्नो कुशल र प्रभावकारी उद्घोषण शैलीका माध्यमबाट उहाँले कार्यक्रमलाई चुस्त, व्यवस्थित र रोचक ढंगले अगाडि बढाउनुभएको थियो। कार्यक्रमको सुरुवाती आसन ग्रहणदेखि समापनसम्मका हरेक चरणलाई समयको सीमाभित्रै रहेर सहजीकरण गर्दै उहाँले उपस्थित अतिथि र स्थानीयको ध्यान केन्द्रित गर्न सफल हुनुभयो। संस्थाको सामाजिक उत्तरदायित्वलाई समुदायमाझ प्रस्ट पार्दै कार्यक्रमलाई उर्जावान् र भव्य बनाउन शाखा प्रबन्धक एम.सी. ज्यूले महत्त्वपूर्ण भूमिका निर्वाह गर्नुभएको थियो।
